خطوات كتابة المحتوى | ازاي تكتب محتوى مميز ومؤثر؟

أي حد يقدر يكتب محتوى؛ دي حقيقة، لكن مش أي حد يقدر يكتب محتوى مؤثر وجذاب!

ودا لأن كتابة المحتوى المؤثر بتعتمد على مزيج من المعرفة، والمهارات، والإبداع، وفقدانك لعنصر من التلاتة دول هيؤثر بدرجة ما على الـ POC بتاعتك.

لكن ازاي تحقق المعادلة، وتوازن بين العناصر دي؟

دا اللي هنوضحه في المقال، وهنشارك معاك خطوات كتابة المحتوى بشكل تفصيلي، فتابع معانا.

الخطوة الأولى: ما قبل كتابة المحتوى (الـ Prewriting)

كاتب المحتوى زي الشيف الشاطر، قبل ما يبدأ لازم يجهز مكونات الـ Recipe الأول، ودا اللي بيحصل في الـ Prewriting، أول خطوات كتابة المحتوى.

بتمر الخطوة دي بـ 3 مراحل أساسية، وهما:

تحديد الهدف – Goal

عاوز توصل لإيه من خلال الـ POC بتاعتك؟

زيادة Leads، أو Traffic للويب سايت بتاعك، ولا مجرد Awareness! وبناءً على الهدف هتختار نوع المحتوى، وأسلوب الكتابة، وغيرهم.

فمثلًا لو عندك Brand متخصص في منتجات الأطفال، في الفترة اللي قبل العيد هيكون هدفك إيه من الـ Content؟

طب لو الـ Brand دا لسه في بدايته؛ هيكون تركيزك الأكبر على إيه وأنت بتكتب؟

تحديد هدفك بدقة هيساعدك تركز أكتر أثناء كتابة المحتوى، وهيسهل عليك تقيس نتيجة شغلك بعد كدا، ومدى تحقيقه للهدف، وكمان هيخليك تركز أكتر في المرحلة التانية وهي الـ Search.

البحث – Search

ودي الخطوة اللي بتميز POC عن التانية، فلازم تاخد وقتك في الـ Search لأنه مش بس هيديك أفكار حلوة ومناسبة، لكنه عامل أساسي لزيادة الثقة فيك، أو هدمها من الأساس.

فلو أخدت وقتك في المرحلة دي، وركزت على هدفك، واعتمدت مصادر موثوقة؛ دا هيخليك تنتج محتوى مميز، ومؤثر.

لكن إيه الخطوات اللي محتاج تعملها في المرحلة دي عشان توصل لأفضل نتيجة؟

في مرحلة الـ Search خطواتك بتختلف حسب نوع المحتوى اللي بتكتبه، يعني لو بتكتب Social Media Content فهيكون هدفك الوصول لفكرة كويسة، وHeadline مناسب، ومعلومات عن الـ Topic اللي هتكتب فيها عشان محتواك يكون قائم على أسس علمية.

أما لو بتكتب مقال From Scratch؛ فهتحتاج وقتها تعمل Keyword Research قبل ما تكتب، دا بجانب العناصر السابقة.

كمان الـ Platform اللي بتعمل عليها Search هتختلف حسب طبيعة المجال، والـ Audience، فمثلًا لو بتستهدف الأمهات؛ فبالإضافة لـ Google؛ جروبات الماميز هتكون مفيدة جدًا، لأنك هتقدر توصل من خلالها لمشكلات الـ Audience، ومخاوفهم، وتفهم أسلوب تفكيرهم، وبالتالي تقدملهم المحتوى اللي محتاجينه.

لكن لو بتكتب في الـ Business أو الـ Job Skills فـ LinkedIn هيكون خيار مثالي بجانب Google، وهكذا.

وما ينفعش طبعًا نُغفل أهمية الـ AI Tools في المرحلة دي، واللي هتساعدنا ننظم أفكارنا، وتسهل علينا مرحلة الـ Search، وتقلل الوقت المستغرق فيها.

اختيار الفكرة – Idea

بعد ما تحدد الهدف؛ وتعمل Search مبدئي؛ الخطوة التالتة هتكون اختيار Idea مناسبة لهدفك، أو Keyword لو بتكتب مقال.

لازم الـ Idea أو الـ Keyword اللي اخترتها تكون بتخدم على الهدف، وبتدور حوالين الـ Message اللي عاوز توصلها للـ Audience، وفي نفس الوقت تكون بتحل مشكلة، أو بتلبي احتياج عندهم.

لو بنينا على المثال السابق بتاع الماميز؛ إيه الـ Ideas اللي ممكن تناسب الـ Audience بتوعنا، وتجذب انتباههم؟

وهننهي مرحلة الـ Prewriting بأننا نعمل Brainstorming عشان نسجل، ونرتب كل أفكارنا، ونختار أنسبها قبل كتابة المحتوى.

الخطوة الثانية: مرحلة كتابة المحتوى – Writing

عشان الـ POC تطلع حلوة؛ لازم تنطبخ على نار هادية؛ ودا اللي هنعمله في مرحلة الـ Writing، لكن ازاي نكتب الـ POC؟

عشان تكتب قطعة محتوى ناجحة؛ لازم تعرف مكوناتها الأول، وهي:

العنوان – Headline

العنوان هو العنصر الأهم في الـ POC بتاعتك؛ خاصة لو بتكتب محتوى للسوشيال ميديا، ولأهميته الكبيرة قال عليه الكاتب التركي Ugur Akinci إنه “الفيصل بين النجاح والفشل” للـ POC.

ودا لأنه بيصنع الانطباع الأول عند جمهورك تجاه محتواك، فإما يشد انتباه العميل لقراءة محتواك، أو يخليه يـ Skip ببساطة.

لكن ازاي تكتب عنوان يلفت الانتباه بسهولة؟ المقال دا هيساعدك: فن كتابة العناوين.

المقدمة – Intro

هنا أنت مش بس عاوز تشد انتباه الجمهور؛ لكنك محتاج تحفزهم على قراءة الـ POC بتاعتك بشكل كامل، وعشان تنجح في دا؛ لازم تديهم سبب أو حافز يكملوا عشانه.

الحافز دا ممكن يكون تمهيد لحل مشكلة بتواجههم، أو Hook قوي يشد انتباههم، أو حتى توظيف لـ Trend لذيذ وشاغل تفكيرهم الوقت دا.

ولو عاوز تعرف أكتر عن أهمية الـ Intro في كتابة المحتوى، وازاي تكتبها؛ اقرأ المقال دا: القواعد الأساسية لكتابة المقدمة.

جسم المحتوى – Body

في الـ Body أنت بتكتب كل المعلومات المهمة اللي عاوز توصلها للـ Audience، وبتفرغ خلاصة الـ Search اللي عملته، في شكل محتوى سلس وممتع، يفيد جمهورك من غير ما يخليهم يملوا، يعني لازم تجمع فيه ما بين الفايدة، والتنظيم، والمتعة.

وعشان جمهورك يستمتع بالـ POC بتاعتك، وما يفصلش وهو بيقرأها؛ لازم تراعي شوية حاجات في الـ Body، زي:

حدد النقاط الرئيسية

قبل ما تصيغ محتواك؛ لازم تنظم النقط الرئيسية اللي هتتكلم فيها، أو الـ Outline لو بتكتب مقال، عشان تكتب بشكل منظم وتبعد عن العشوائية في الـ Search، والكتابة.

حافظ على الارتباط

حاول تخلي فقرات الـ POC مترابطة قدر الإمكان، ومبنية على بعضها، عشان جمهورك يتنقل بين الفقرات بسلاسة، وما يفصلش منك في النص.

ركز على الفكرة الأساسية

بلاش تخلي محتواك عبارة عن معلومة من الشرق، وأخرى من الغرب.

أنت عاوز توصل رسالة أو فكرة محددة، ركز عليها طول ما أنت بتكتب، ولو حسيت نفسك بعدت عنها لحظة؛ لف وارجع تاني.

استخدم مصطلحات مناسبة

والمصطلحات المناسبة هنا بتختلف من Industry للتانية، ومن جمهور للتاني في نفس الـ Industry

فمثلًا لو بتقدم محتوى عن مستحضرات التجميل، وبتستهدف المستهلكين؛ أسلوبك هيميل للبساطة والبعد عن المصطلحات العلمية المعقدة، بعكس ما لو كان الـ Audience بتوعك هما دكاترة التجميل، أو الصيادلة المتخصصين في صناعة المستحضرات دي.

نظم محتواك

تنظيم وتنسيق المحتوى خطوة مهمة جدًا عشان القارىء ينسجم معاك، فبلاش تخلي الـ POC عبارة عن بلوك واحد عشان ما تأذيش عين الجمهور، لكن اكتبها في شكل فقرات قصيرة، ومترابطة، ولو بتكتب مقال؛ فرتب النقاط الرئيسية بتاعته في شكل عناوين فرعية.

دي أهم النقاط اللي محتاج تراعيها وأنت بتكتب الـ Body، عشان تمهد لاستجابة الـ Audience للـ CTA.

الـ Call to Action –  CTA

هنا أنت بتستعد لحصاد نتيجة تعبك، من خلال تحفيز الجمهور على اتخاذ Action معين.

الـ Action دا ممكن يبقى مجرد تفاعل مع المحتوى، أو الدخول للويب سايت بتاعك، أو حتى شراء منتج أو خدمة، لكن ضروري جدًا يكون مضمون الـ CTA متماشي مع مضمون باقي المحتوى.

وعشان تكتب Call To Action ناجح يحقق الهدف المطلوب منه؛ لازم تراعي فيه شوية حاجات، زي:

الوضوح

خلي الـ CTA واضح ومحدد، عشان ما تشتتش الجمهور، وبالتالي يقدروا يفهموا الإجراء المطلوب ببساطة.

فمثلًا لو بتبيع منتج من خلال الويبسايت ممكن الـ CTA يكون “اشتر الآن”، أو “أضف إلى السلة”، في الحالة دي الجمهور هيفهم هو مطلوب منه إيه عشان يشتري، لكن تفتكر لو كتبت بدالهم “اضغط هنا”، هل العميل هيفهم أنت عاوز إيه؟

تحفيز العاطفة

التحفيز العاطفي في الـ CTA بينقله مكان تاني خالص، فبدل ما يكون مجرد فعل لصالحك؛ هيدي إحساس للعميل إن الـ Action فيه مصلحة ليه هو.

مثال : “اشتركي معانا وسهلي رحلة تعليم طفلك”.

تضمينه طلب واحد

حاول قدر الإمكان تخلي الـ CTA بتاعك متضمن لطلب واحد بس، عشان تسهل على جمهورك الاستجابة ليك، لأن طلبك لأكتر من حاجة منهم في نفس الوقت هيشتتهم، وبدل ما يستجيبوا؛ هتوصل لنتيجة عكسية.

ممكن كمان تستخدم ظاهرة الـ FOMO في الـ CTA عشان تحفز جمهورك ياخد Action بسرعة، على سبيل المثال: “الحق قبل فوات الأوان”، “ما تفوتش العرض”.

دي كدا العناصر الأربعة الأساسية لأي POC سواءً كانت مقال، أو Social Media Content، وفي حالة المقال ممكن نكتفي بـ Conclusion بدل الـ CTA.

لكن هل لازم نمشي على نفس الترتيب دا واحنا بنكتب؟

عشان توصل لأفضل نتيجة في أسرع وقت؛ ابدأ بالأسهل.

والأسهل عادة بيكون الـ Body، لكن دا ما يمنعش إنك تسجل أي فكرة تيجي في دماغك وتحسها مناسبة، سواءً كانت للـ Headline، أو الـ Intro، أو الـ CTA.

وبعد ما تكتب الـ Body غالبًا هتلاقي أفكار كتير وأنت بتكتب تسهل عليك كتابة المحتوى الباقي.

لكن هل خطوة الكتابة هي الأخيرة، وبعدين نـ Publish علطول، ولا في حاجة بعدها؟

الخطوة الثالثة: تعديل المحتوى Editing

الخطوة دي من خطوات كتابة المحتوى هي اللي بتفرق بين POC والتانية، ولأهميتها الكبيرة Brian Clark قال عنها إنها بتحول الـ POC إلى “جرعة صحية من الإبداع تتجاوز التسويق وتصبح شيئًا أكبر”.

ودا لأنها بتفرق كتير جدًا في الشكل النهائي للمحتوى بتاعك، وعشان تـ Edit المحتوى بسهولة حاول تطبق النصايح دي:

خد Break

ما ينفعش تخلص كتابة وتبدأ تـ Edit علطول بدون ما تفصل، خد Break حتى لو قصير تفصل بيه وتستجمع أفكارك عشان تراجع بروقان.

احذف الزوايد والتكرار

وأنت بتكتب أحيانًا ممكن توصل الـ Message الواحدة في أكتر من جملة، ودا بيعد تكرار، حاول تـ Handle محتواك، وتحذف الزوائد والتكرار اللي فيه، وكمان تضيف عليه لو حسيته لسه ناقصه حاجة.

حافظ على قواعد اللغة

الأخطاء اللغوية ممكن تحول معنى كلامك تمامًا، دا غير إنها بتشتت القارىء وتؤذي نظره، عشان كدا مهم جدًا تراعي القواعد وأنت بتراجع، وتعدل الأخطاء.

ولو الخطوة دي صعبة عليك؛ كتاب مختصر الأخطاء اللغوية هيسهلها.

وازن بين الوضوح والإبداع

عشان المحتوى يحقق الهدف المطلوب منه؛ لازم يكون واضح ومفهوم للقارىء، لكن الوضوح والبساطة هنا مش معناها إنك تبعد عن الإبداع وتتجاهله.

مهم جدًا توازن بين الاتنين، عشان تحقق مزيج المتعة، والفايدة للـ Audience.

ركز على الهدف

استغراقك فترة طويلة في كتابة المحتوى -خاصة المحتوى الطويل- ممكن يبعدك شوية عن الهدف اللي بتكتب عشانه، وهنا مرحلة الـ Editing بتكون بمثابة رمانة الميزان اللي بتعيد الأمور لنصابها الصحيح.

حب ما تعمل

لو اتعاملت مع خطوة الـ Editing على أنها واجب تقيل؛ مش هتظبط معاك، وهتوقع منك تفاصيل كتير وأنت شغال، عشان كدا مهم جدًا تعملها بحب، وصبر.

ما تبعدش عن الـ Voice

كل براند ليه Voice بيميزه، و العملاء بتوعه بيرتبطوا بالـ Voice دا، فمهم تحافظ على الـ Voice وأنت بتكتب وبتـ Edit عشان  Personality شركتك ما تتهزش.

كررها من تاني

خلصت مراجعة وEditing خلاص؟ عيد من تاني.

لأن غالبًا أول مرة مش بتكون كفاية، فيُفضل تراجع من مرتين لـ 3 مرات، أول مرة تكون مراجعة عميقة، وتاني مرة تكون بشكل سريع عشان لو حاجة وقعت منك في المرة الأولى، والتالتة ممكن تخليها لمراجعة الهيكلة بشكل عام.

دي أهم خطوات كتابة المحتوى؛ لكن ازاي تبقى كاتب محتوى ناجح ومؤثر؟

الخلاصة: ازاي تنتج محتوى فعّال ومؤثر؟

زي ما قولنا في بداية المقال؛ المحتوى المؤثر بيكون مزيج بين المعارف، والمهارات، والإبداع.

المعرفة

ودي العنصر الأسهل في التلاتة، لكنها مش بسيطة أبدًا، ومن غيرها المحتوى هيكون بدون قيمة.

فلازم تجمع داتا موثوقة عن الموضوع اللي هتكتب فيه قبل ما تبدأ، ودا طبعًا بنعمله عن طريق الـ Search المطَوَّل.

المهارات

كتابة المحتوى مهارة بنتعلمها واحدة واحدة، بندرس قواعدها، وبنتقنها من خلال التطبيق العملي، هتغلط في البداية، وتواجه مشكلات وصعوبات، لكن مع التكرار، والتحسين هتتميز وتوصل لمرحلة التأثير بمحتواك.

ممكن تنمي المهارة دي من خلال التطبيق العملي، وعرض شغلك على متخصص وطلب Feedback منه باستمرار، بالإضافة إلى مذاكرة الكورسات، وقراءة الكتب المتخصصة في المجال.

ولو أنت لسه مبتدىء الكورس دا ممكن يفيدك: First Time Copywriter.

الإبداع

الموهبة والإبداع بيميزوا كاتب محتوى عن التاني، لكن بلاش تمحور تفكيرك على المنطقة دي، لأن الإبداع لوحده مش كفاية.

كتابة المحتوى المميز ممكن تعتمد على الـ Creativity، لكن مش كل محتوى Creative هيكون مؤثر، فلازم تدمج معاه العنصرين السابقين.

في النهاية عملية كتابة المحتوى بمثابة السهل الممتنع والممتع في نفس الوقت، ومهارة عشان تحقق أهدافك من خلالها، لازم تنميها وتطورها باستمرار، ولو راعيت خطوات كتابة المحتوى السابقة هتقدر تكتب Piece Of Content ناجحة ومؤثرة، تحقق الهدف المطلوب منها.